कर्मचारी छिटो घर जाउन् र बच्चा जन्माउन् भनेर टिकटक, पबजी कम्पनीको नयाँ नियम

मनोरञ्जन रोचक समाचार समाज

काठमाडौं। विश्वकै सबैभन्दा धेरै जनसंख्या भएको देश चीनले केही दशक पहिले जनसंख्यामा रोक लगाउन निकै कडा नियम लागू गरेको थियो । त्यसपछि त्यहाँ प्रजनन दरमा निकै कमी आयो र यसको परिणामस्वरुप त्यहाँको धेरैजसो जनसंख्या अहिले वृद्धावस्थातर्फ अग्रसर छ । यही कारण अहिले चीन सरकारले प्रजननमा छुट दिएको छ । अब त्यहाँ एक दम्पतीले ३ जनासम्म बच्चा जन्माउन पाउँछन् ।

अब त्यहाँका युवा जोडीलाई बच्चा जन्माउन प्रोत्साहित गर्न थालिएको छ । चीनका ठूला कम्पनीहरुले अब कर्मचारीलाई आफूले काम गर्ने समयभन्दा बढी समय ओभरटाइम गर्न दिने प्रचलन हटाउन थालेका छन् । कर्मचारीहरुको व्यवसायिक र निजी जीवनमा सन्तुलन कायम गर्न भन्दै त्यहाँका प्रविधि कम्पनीहरुले विकेन्डमा ओभरटाइम गर्ने संस्कृति हटाउँदैछन् । यसको पछाडिको प्रमुख कारण युवा जोडीलाई धेरै पारिवारिक समय दिनु हो ताकि उनीहरु बच्चा जन्माउन् र परिवारलाई अगाडि बढाउन् ।

पछिल्लो पटक अत्यन्तै लोकप्रिय भिडियो शेयरिङ एप टिकटकको माउ कम्पनी बाइटडान्सले विकेन्डमा ओभरटाइम गर्ने नीतिलाई रद्द गरेको छ । चीनले घट्दो प्रजनन दर बढाउने राष्ट्रिय नीति लिएको छ र कम्पनीले यही राष्ट्रिय उद्देश्यलाई सघाउन यस्तो निर्णय गरेको हो । यो नीति आउँदो अगष्ट १ देखि पूर्ण रुपमा लागू हुनेछ । अहिले चीनमा कर्मचारीहरु दिनमा १२ घण्टासम्म काम गर्छन् यसबाहेक विकेन्डमा विदाको समयमा पनि काम गर्छन् । तर, यी कम्पनीमा अब यसरी काम गर्न पाइने छैन ।

चिनियाँ अखबार स्ट्रेट टाइम्सका अनुसार त्यहाँका युवा जोडीले कामको अधिक बोझ महसुस गर्छन् जसको असर उनीहरुको निजी जीवनमा परिरहेको छ । गत वर्ष चीनको राष्ट्रिय प्रजनन दर १.३ को सबैभन्दा तल्लो स्तरमा झरेको थियो । यसको मुख्य कारण त्यहाँ ‘नेइ जुआन’लाई मानिएको थियो जसको अर्थ हुन्छ कि कम्पनीमा कर्मचारी अन्य कर्मचारीसँग प्रतिस्पर्धा गर्नको लागि दबाबमा आउँछन् ताकि उनीहरु पछि नपरुन् । विशेषज्ञहरुले ओभरटाइम संस्कृति हटाउँदा ‘नेइ जुआन’ कम हुने र यो कर्मचारीको लागि लाभदायक हुने बताएका छन् ।

चिनियाँ प्रविधि कम्पनी कुआइशोले गत महिना तथा लाइटस्पिड एण्ड क्वान्टम स्टुडियोले २ हप्ता पहिले ओभरटाइमका विषयमा नीतिगत परिवर्तनको घोषणा गरेका छन् । कुआइशो बाइटडान्सको प्रतिस्पर्धी कम्पनी हो । लाइटस्पिड एण्ड क्वान्टम स्टुडियो भिडियो गेम विकास गर्ने कम्पनी हो जसले लोकप्रिय गेम पबजी चलाउँछ । दुवै कम्पनीलाई चीनको ठूलो बहुराष्ट्रिय कम्पनी टेनसेन्टले समर्थन गरेको छ ।

admin
Author: admin

Leave a Reply

Your email address will not be published. Required fields are marked *